హైదరాబాద్‌, (ఆరోగ్యజ్యోతి) : రాష్ట్రంలో కొత్త వ్యవసాయ విధానం రావాల్సిన అవసరం ఉందని సీఎం కేసీఆర్ అన్నారు. తక్కువ శ్రమ, ఎక్కువ దిగుబడి, మార్కెట్‌ అవకాశాలు, మంచి ఆదాయం పొందగలిగిన పంటలను గుర్తించి వాటిని రైతులకు సూచించాలని సీఎం అధికారులను ఆదేశించారు. వ్యవసాయ, పౌరసరఫరాలశాఖలపై సీఎం కేసీఆర్ బుధవారం ప్రగతిభవన్‌లో సమీక్ష సమావేశం నిర్వహించారు. మంత్రులు సింగిరెడ్డి నిరంజన్‌రెడ్డి, గంగుల కమలాకర్‌, ఇతర ఉన్నతాధికారులు భేటీలో పాల్గొన్నారు. రాష్ట్రంలో నూతన వ్యవసాయ విధానం రూపకల్పన, ధాన్యం కొనుగోళ్లు, అకాల వర్షాలు, ఎరువులు, విత్తనాల సేకరణపై సీఎం కేసీఆర్ సమీక్షించారు. ఈ సందర్భంగా సీఎం కేసీఆర్ మాట్లాడుతూ... రాష్ట్రంలోని ప్రజల ఆహార అవసరాలకు తగినట్లు మార్కెట్‌లో డిమాండ్‌ కలిగిన పంటలను సాగు చేసేటట్లు రైతులకు మార్గదర్శకం చేయాలన్నారు. వరి మాత్రమే కాకుండా ఇంకా ఏ పంటలు సాగు చేయడం వల్ల రైతులకు మేలు కలుగుతుందో అధ్యయనం చేసి మే 5లోగా ప్రభుత్వానికి నివేదిక ఇవ్వాలన్నారు. రాష్ట్రంలో 40 లక్షల టన్నుల నిల్వ సామర్థ్యం కలిగిన గోదాంల నిర్మాణం కోసం వెంటనే స్థలాలను గుర్తించాలన్నారు. కొత్తగా నిర్మించే గోదాముల్లో కోల్డ్‌ స్టేరేజ్‌ సదుపాయం కల్పించాలన్నారు. వరిలో సన్న రకాలను ఎక్కువగా సాగుచేసే విధంగా రైతులను చైతన్య పరచాలన్నారు.
కొత్త వ్యవసాయ విధానం రావాలి...
రాష్ట్రంలో గతంలో ప్రాజెక్టులు, కరెంటు సరిగా లేకపోవడం వల్ల సాగునీటి లభ్యత అంతగా లేదన్నారు. గత ప్రభుత్వాలు వ్యవసాయాన్ని సరిగ్గా పట్టించుకోలేదన్నారు. రైతులు ఎవరికి తోచినట్లు వారు వనరులకు అనుగుణంగా పంటసాగు చేశారన్నారు. అందరూ ఒకే పంట వేయడం వల్ల ధరలు కూడా రాలేదన్నారు. కాగా ఇప్పుడు తెలంగాణలో పరిస్థితి మారుతుందన్నారు. ప్రతీ మూలకూ సాగునీరు అందుతోందన్నారు. రైతులను సరిగ్గా నిర్ధేశించగలిగితే లాభదాయక వ్యవసాయం చేస్తారన్నారు. పంట ఎంపిక, సాగు పద్ధతులు, ఎరువుల వాడకం, మార్కెటింగ్‌లో మార్పులొస్తాయన్నారు. రాష్ట్రంలో కొత్త వ్యవసాయ విధానం రావాల్సిన అవసరం ఉందన్నారు. రాష్ట్రంలో ఎక్కువగా వరి పండిస్తున్నారు. ఇందులో మళ్లా పంటకాలం తక్కువనే కారణంతో దొడ్డు రకాలు పండిస్తున్నారన్నారు. కానీ ఎక్కువమంది ప్రజలు సన్నరకాలు తింటున్నట్లు తెలిపారు. సన్న రకాలకు ఇతర రాష్ర్టాలు, దేశాల్లో కూడా మంచి డిమాండ్‌ ఉందన్నారు. ఇప్పుడు సాగునీటి వసతి కూడా ఉంది కాబట్టి రైతులు ఎక్కువగా సన్నరకాలు పండించే విధంగా చైతన్యం పరచాలన్నారు. రైతులంతా ఒకే పంట కాకుండా వేర్వేరు పంటలు సాగు చేయాలని అలా అయితేనే అన్ని పంటలకు డిమాండ్‌ వస్తుందన్నారు.
డిమాండ్‌ పంటలను గుర్తించాలి...
ఏ రైతు ఏ పంట వేయాలో నిర్ణయించి, సాగు చేయించాలన్నారు. వేరుశనగ, కందులు, పామాయిల్‌ లాంటి వాటికి మార్కెట్‌లో డిమాండ్‌ ఉందని.. డిమాండ్‌ కలిగిన పంటలను గుర్తించాలన్నారు. వాటిని ఎన్ని ఎకరాల్లో పండించాలనే విషయం తేల్చాలన్నారు. రాష్ట్రంలో కూరగాయలు, పండ్లకు కూడా కొరత ఉందని, అవి ఏ మోతాదులో పండించాలి అనే విషయంపై అధ్యయనం జరగాలన్నారు. నీటి వసతి పెరిగినందున ఫిష్‌ కల్చర్‌ను తెంగాణలో విస్తరించవచ్చా అనే విషయాన్ని శాస్త్రీయంగా ఆలోచించాలన్నారు. ఎరువుల వాడకం ఇప్పటిలాగానే ఉండాలా? మార్పులు అవసరమా? అనే విషయాలను కూడా పరిశీలించాలన్నారు. పూర్తిస్థాయి అధ్యయనం చేసి మే 5వ తేదీ లోగా నివేదిక ఇవ్వాలని సీఎం కేసీఆర్ పేర్కొన్నారు.