హైదరాబాద్‌,(ఆరోగ్యజ్యోతి): జాతీయ వైద్య కమిషన్‌(ఎన్‌ఎంసీ) తరహాలోనే ‘జాతీయ దంత కమిషన్‌(ఎన్‌డీసీ)’ను కేంద్ర ప్రభుత్వం త్వరలో తీసుకురానుంది. దీనికి సంబంధించిన బిల్లును రూపొందించిన కేంద్ర ఆరోగ్య కుటుంబ సంక్షేమ శాఖ.. తొలుత ప్రజాభిప్రాయ సేకరణలో భాగంగా నమూనా బిల్లును బుధవారం విడుదల చేసింది. ఈ ఎన్‌డీసీ బిల్లుపై ప్రజలు, భాగస్వాములు ఎవరైనా తమ అభిప్రాయాలు, సూచనలు, సలహాలను వచ్చే నెల 20 లోపు పంపించాలని సూచించింది.
బిల్లులోని ముఖ్యాంశాలివీ..
* ఇక నుంచి భారతీయ దంతమండలి స్థానంలో జాతీయ దంత కమిషన్‌ ఏర్పాటు కానుంది.
* దీనిలో ఒక ఛైర్‌పర్సన్‌(తప్పనిసరిగా దంత వైద్యుడై ఉండాలి), ఏడుగురు ఎక్స్‌అఫిషియో సభ్యులు, 22 మంది తాత్కాలిక సభ్యులుంటారు.
* దంత వైద్యవిద్యలో ప్రవేశాలకు జాతీయ అర్హత ప్రవేశ పరీక్ష(నీట్‌)లో సాధించిన మార్కులనే ప్రామాణికంగా పరిగణిస్తారు.
* ఎంబీబీఎస్‌ వైద్యవిద్యార్థుల మాదిరిగానే దంత వైద్యవిద్యార్థులు కూడా ఆఖరి సంవత్సరంలో ‘నెక్స్ట్‌’ను రాసి ఉత్తీర్ణత సాధించాలి. దానిలో పాస్‌ అయితేనే దంత వైద్యుడిగా సేవలందించడానికి అర్హులవుతారు.
* నెక్స్ట్‌లో ఉత్తీర్ణతనే పీజీ దంత వైద్యవిద్యలో ప్రవేశాలకు అర్హత.
* విదేశాల్లో దంత వైద్యను అభ్యసించిన విద్యార్థులు సైతం నెక్స్ట్‌లో ఉత్తీర్ణత సాధించాలి.