బీజింగ్: కరోనా వైరస్‌తో పోరాటం చేస్తున్న చైనా ఓ అద్భుత ఫీట్‌ను సాధించింది. కరోనా రోగులకు చికిత్సను అందించేందుకు కేవలం 48 గంటల్లో ఓ ఆసుపత్రిని సిద్ధం చేసింది. అప్పటికే నిర్మాణం పూర్తైన భవనాన్ని 1000 పడకల డెబీ మౌంటెన్ రీజనల్ మెడికల్ సెంటర్‌గా తీర్చిదిద్దింది. 500 మంది నిర్మాణ కార్మికులు, పోలీసులు అకుంఠిత దీక్షతో ఈ పీట్‌ను సాధించారు. కరోనా వైరస్ కేంద్రమైన వూహాన్‌కు కొద్ది దూరంలోనే ఈ ఆసుపత్రిని సిద్ధం చేశారు. స్థానిక కాలమానం ప్రకారం గత రాత్రి 10.30 నుంచి ఈ ఆసుపత్రి సేవలు అందించడం ఆరంభించింది. వాస్తవానికి ఆసుపత్రి కోసమే ఈ భవనాన్ని నిర్మించినప్పటికీ, సేవలు ప్రారంభించేందుకు ప్రభుత్వం మే నెలను డెడ్ లైన్‌గా పెట్టుకుంది.
అయితే కరోనా తీవ్రత దృష్ట్యా నిర్మాణ పనులను వేగిరం చేసిన ప్రభుత్వం కేవలం 48 గంటల్లో ఆసుపత్రిని పూర్తి స్థాయిలో అందుబాటులోకి తెచ్చింది. ఇక కరోనా వైరస్ వ్యాప్తికి కేంద్రమైన వూహాన్ నగరంలో ఇంతకంటే భారీ ఆసుపత్రిని ప్రారంభించే క్రమంలో ప్రభుత్వం తలమునకలై ఉంది. సోమవారం నాటికి దీన్ని ప్రారంభించాలని ప్రభుత్వం టార్గెట్ పెట్టుకుంది. అయితే ఇలా ఆఘమేఘాల మీద ఆసుపత్రులను సిద్ధం చేయడం చైనాకు కొత్తేమీ కాదు. 2003లో సార్స్ వైరస్ విజృంభించినప్పుడు కూడా అక్కడి ప్రభుత్వం బీజింగ్ నగరంలో కేవలం ఏడు రోజుల్లోనే సరికొత్త ఆసుపత్రిని రెడీ చేసింది. ముందుగా తయారు చేసి పెట్టిన నిర్మాణ విడిభాగాలతో ఈ భవన నిర్మాణాన్ని పూర్తి చేసింది. కరోనా వైరస్‌ను కట్టడి చేసేందుకు తాజాగా ఇదే విధానాన్ని ప్రభుత్వం అవలంబిస్తోంది. ఉరుకులు పరుగుల మీద మరో 4 ఆసుపత్రులను సిద్ధం చేస్తోంది.